Ekspress 2003-08-30

Türkiyə İrandakı mümkün dəyişikliklərə hazır olmalıdır. Nə qədər ki, gec deyil, Güney azərbaycanlıları ilə eyni mədəniyyətə, dinə, vahid soykökə malik olan türklər fars rejiminə qarşı mübarizə aparan milli hərəkat fəallarının mücadilələrini dəstəkləməli və bu tip mövqe ilə çıxış etməlidirlər. Bu barədə Türkiyədə səfərdə olan Güney Azərbaycan Milli Oyanış Hərəkatının (GAMOH) lideri doktor Mahmudəli Çöhrəqanlı dünən İstanbulda Ylkü Ocaqlarının İl Başqanlığının yerli bürosu tərəfindən təşkil olunmuş toplantıda çıxış edərkən bildirib.
 

Yaxın vaxtlarda İranda böyük dəyişikliklər olacağını bildirən Mahmudəli Çöhrəqanlının sözlərinə görə, hadisələrin indiki gedişi müttəfiq və dost dövlətlərin Azərbaycan türklərinə dəstəyini artırmasını zəruriləşdirir. Onun fikrincə, Güney Azərbaycanın ərazilərinin sərhədləşməsindən sonra millətin Ankaradan gözləyəcəyi dəstək bir sıra sahələri əhatə edəcək. İrandakı soydaşlarımızın xüsusi ordu, bayraq, sərhəd və ən önəmlisi milli haqlarına sahib olacaqlarını bildirən GAMOH sədri Türkiyənin hər zaman milli hərəkata müdaxiləsini vacib sayıb.

Tədbirdə çıxış edən Ylkü Ocaqlarının İl Başqanı Yusuf Arpacıq Türkiyə millətçilərinin Güney Azərbaycandakı soydaşlarımıza hər zaman dəstək olduğunu və millətin öz haqları uğrunda mübarizəsində bütün yardımlarını əsirgəməyəcəklərini bildirib.

Qeyd edək ki, artıq üçüncü gündür ki, Türkiyənin İstanbul şəhərində səfərdə olan GAMOH lideri Mahmudəli Çöhrəqanlı yaxın həftələrdə buradakı görüşlərini başa vuraraq, Ankaraya gedəcək. GAMOH-un Bakı bürosunun rəhbəri Hüseyn Türkellinin "Ekspress"ə verdiyi məlumata görə, Türkiyə paytaxtında Çöhrəqanlının bu ölkənin rəsmi şəxslərilə görüşləri də nəzərdə tutulur. İndiliksə bütün diqqətini GAMOH-un Türkiyədəki təmsilçiliklərinin fəaliyyətinə və eyni zamanda türk millətçiləri ilə əlaqələrin genişləndirilməsinə ayıran doktor Çöhrəqanlı ankaranın bir sıra mətbuat orqanlarında da görüş keçirməyi planlaşdırır.

Xezer Altayli