525ci qazet 2003-12-20
"Dekabrın 17-də, İçərişəhərdə, Asəf Zeynallı küçəsi 14 ünvanındakı Güney Azərbaycan Milli Oyanış Hərəkatı (GAMOH) Bakı bürosunun ofisi yerləşən binada baş vermiş yanğın İranın xüsusi xidmət orqanlarının təxribatıdır" - deyə GAMOH-un Bakı bürosunun rəhbəri Hüseyn Türkelli "AssA-İradə" agentliyinə verdiyi müsahibədə bildirib. Onun sözlərinə görə, yanğının səbəblərini araşdıran istintaq qrupu hadisə yerində içərisindən alışdırıcı maye iyi gələn ərimiş vəziyyətə düşmüş butulka tapıblar.

Bundan əlavə, həmin gün İran İslam Respublikasının Azərbaycandakı səfirliyinin əməkdaşları binanın həyətinə girməyə cəhd göstərsələr də, GAMOH fəalları buna mane olublar. H.Türkelli yanğından xəsarət alaraq 5 saylı xəstəxanada yerləşdirilmiş 2 iranlı tələbənin - GAMOH fəallarının İranın kəşfiyyat orqanları tərəfindən xüsusi nəzarətə götürüldüyünü deyib. Onun sözlərinə görə, bunda məqsəd terror aktını ört-basdır etməkdir.

Tehran rejiminin GAMOH-un Bakı bürosunu çoxdan "iflic vəziyyətinə" salmaq niyyətində olduğunu vurğulayan H.Türkelli yanğın zamanı ofisdə yerləşən "Güney Azərbaycanın səsi" radiostansiyasının bərbad hala düşdüyünü söyləyib.