İran prezidenti Məhəmməd Xatəminin bu günlərdə Təbriz şəhərinə səfər edəcəyi gözlənilir. Onun Təbriz əhalisi ilə görüşü İranda qarşıdan gələn parlament seçkiləri ilə əlaqədardır. Əhalisinin böyük əksəriyyəti Güney Azərbaycan türkləri olan Təbriz İran prezidentinin növbəti "vədlərini" gözləyir. Lakin türklərin Xatəmiyə dəstək verəcəyi və onun fikirlərinin, çağırışlarının arxasınca gedəcəyi barədə bədbin proqnozlar verilir.

Çünki İranda şəxsi mənfəətlərini və siyasi maraqlarını güdmədən hakimiyyət əleyhinə mübarizə aparan və ona müxalifətdə dayanan əsas qüvvənin Güney Azərbaycan türklərinin olduğu faktdır. Siyasi ekspertlər antidemokratik siyasi xətt tutan Xatəmi hökumətinin İranda yaşayan xalqlar, o cümlədən türklər arasında ciddi dəstəyi olmadığını düşünürlər. İran əhalisinin kifayət qədər böyük hissəsini təşkil edən türklərin ən ibtidai haqlarına sahib olmaması, onların aktiv hissəsinin hər zaman hakim rejimin ciddi təzyiqləri ilə üzləşməsi güneyli türklərin hakimiyyətə qarşı tutduqları mövqelərinə haqq qazandıran amillərdir.

Bu günlərdə Bakını tərk edən Güney Azərbaycan Milli Oyanış Hərəkatının (GAMOH) lideri Mahmudəli Çöhrəqanlı M.Xatəminin Təbrizə səfərinin əhali arasında ciddi və əhəmiyyətli hadisə kimi qarşılanmayacağı qənaətini açıqlayıb. Onun fikrincə, əvvəlki illərdə olduğu kimi, bu dəfə də türklər seçkiləri boykot edəcəklər:

"Xatəminin Təbrizə səfərləri əvvəllər də çox olub. Lakin hər dəfə əhali ilə görüşlərində verdiyi vədlərinə əməl etməyib. Əvvəlki parlament və prezident seçkilərində Güney Azərbaycan türkləri seçkilərdə iştirak etmədi, boykot yolunu tutdu. Əhalinin böyük əksəriyəti seçkiləri tanımadı. Bu dəfə də parlament seçkiləri ərəfəsində eyni vədlər təkrarlanacaq. Amma türklər bunların heç birinə inanmayacaq və seçkiləri yenə boykot edəcəklər".
 

İran prezidentinin Güney Azərbaycan türkləri tərəfindən necə qarşılanacağına dair münasibətini açıqlayan güneyli politoloq Aslan Xalidi hesab edir ki, bu səfər, sadəcə, təbliğat kampaniyasının tərkib hissəsidir. Onun fikrincə, güneyli ziyalılar, fəal insanlar hökumət nümayəndələrinin boş vədlərinə aldanmayacaq:

"Ziyalıların bəyanatlarından da məlum olur ki, onlar hakimiyyətdən demokratik rejim qurulmasını, milli haqlarının tanınmasını istəyirlər. Əhalini vədlərinə əməl etməyən hakimiyyəti dəstəkləməməyə çağırırlar. Onlar Xatəmi ilə görüşlərdə yalnız haqlarına hörmət edilməsini istəyə bilərlər. Ona yalnız "siz millətlərin haqqını tapdalayan hakimiyyətsiniz" deyə bilərlər". A.Xalidinin sözlərinə görə, Güney Azərbaycan hərəkatının fəalları da parlament seçkilərində eyni mövqeni nümayiş etdirəcəklər.