525ci qazet 2003-12-09
"58 il öncə-1945-ci il dekabrın 12-də Azərbaycanın güneyində qurulan milli hökumət Azərbaycanın dövlətçilik tarixinin qürur dolu səhifəsidir". Bu sözlər Güney Azərbaycan Milli Oyanış Hərəkatının (GAMOH) lideri Mahmudəli Çöhrəqanlının hərəkat üzvlərinə ünvanladığı müraciətdəndir. Azərbaycan milli hökumətinin cəmi on bir ay yaşadığını xatırladan GAMOH lideri bu müddətin bir sıra dövlətlərin on bir il illik fəaliyyətindən artıq olduğunu bildirib.

İran fars rejiminin milli hökumət üzərinə ordu ilə yeridiyini və bu şərəf döyüşündə 30 min Güney Azərbaycan türkünün şəhid olduğunu bildirən M.Çöhrəqanlı həm də yüz minlərlə insanın didərgin salındığını qeyd edir.

Milli azadlıq uğrunda şərəf mübarizəsinin bu gün də davam etdiyini deyən GAMOH lideri Güney Azərbaycan türklərini bu mübarizədə daha sıx birləşməyə, milli, insani hüquqları uğrunda daha inadkar mübarizə aparmağa çağırır. Rəsmi Tehranın və onu dəstəkləyən qüvvələrin GAMOH əleyhinə apardığı təbliğata cavab olaraq M.Çöhrəqanlı GAMOH-un Azərbaycan xalqının bağrından qopduğunu və yalnız onun azadlığı üçün mübarizə apardığını bildirir.