Ekspress 2003-09-23

"Artıq uzun müddətdir ki, İran rəsmiləri və onlara yaxın qüvvələr Güney Azərbaycan Milli Oyanış Hərəkatının (GAMOH) liderləri, eləcə də təşkilat üzvləri haqqında genişmiqyaslı təxribatlar və şaiyələr kompaniyasına başlayıb. Azərbaycan türklərinin milli hərəkatını, onun siyasi təmsilçilərinin fəaliyyətini və güclənməsini özünə qarşı ən böyük təhlükə hesab edən Tehran rejimi, güneydəki milli mücadiləni dünya birliyinin gündəminə gətirərək, hərəkatın öndə gedənlərinin guya Amerikadan külli miqdarda yardım almaları barədə şaiyələri dövriyyəyə buraxıb.

GAMOH-u özünə ən böyük alternativ görən İran rəhbərliyinin bu ittihamı tam iftiradır və milli həprəkatın nümayəndələrini ləkələmək cəhdi kimi dəyərləndirilməlidir". Bu barədə dünən Güney Azərbaycan Milli Oyanış Hərəkatının lideri doktor Mahmudəli Çöhrəqanlının "Ekspress"ə ünvanladığı məktubunda bildirilir.
Mahmudəli Çöhrəqanlının fikrincə, Tehran imperiyasının gülünc şaiyələri və milli hərəkat fəallarına qarşı uydurmaları bununla bitmir. "Rejim nökərləri həmçinin GAMOH liderinin guya Azərbaycanın Quzeyində olarkən adları dələduzluqda və hoqqabazlıqda hallanan bəzi şəxslərlə görüşüb, onlardan maddi yardım aldığı barədə cəfəngiyyatla da çıxış etməkdədirlər".

Bütün bu ittihamları "boş yalan" adlandıran doktorun fikrincə, İran rəhbərliyi bu addımı ilə milli hərəkatı boğmaq, Azərbaycan türklərinin mücadiləsini ləkələmək və bu yolla da millətin məğlubiyyətinə nail olmaq məqsədi güdür. "Biz əminiz ki, milli siyasi şüura sahib olan millətimizin nümayəndələri bu kimi şaiyələrin düşmənin 5-ci sütunu - Casusluq Şəbəkəsi tərəfindən hazırlanıb, yayıldığını dərk edirlər və reжimin bu uydurmalarını sadəcə, gülünclə qarşılayırlar" -deyə məktubda bildirilir.

Mahmudəli Çöhrəqanlının sözlərinə görə, onun haqqında və eləcə də GAMOH-un tanınmış üzvlərinə qarşı kütləvi şaiyələrin yayılması ilə əlaqədar fəaliyyətə başlamaq barədə İranın Ali Dini Şurasının bu yaxınlarda Tehranda keçirilmiş növbədənkənar toplantısında qərar qəbul edilib.

Qeyd edək ki, Avropaya növbəti turnesi çərçivəsində ötən ayın sonlarından Türkiyəyə səfərə gedən GAMOH lideri Mahmudəli Çöhrəqanlının Ankaradakı görüşləri davam etdirməkdədir. Onun yaxın zamanlarda Türkiyə rəsmilərilə danışıqlarını başa çatdıraraq, Avropaya, oradansa Amerikaya gedəcəyi gözlənilir.

Xezer Altayli