AB GÜNEYDƏKİ SOYDAŞLARIMIZIN HÜQUQLARININ POZULDUĞUNU BİLDİRİB
 

Olaylar 2003-11-06
Güney Azərbaycan Milli Oyanış Hərəkatının Bakı bürosundan “OLAYLAR”a verilən məlumata görə, GAMOH-un təşəbbüsü ilə yaranmış İran Əsirliyindəki Millətlərin Birlik Komitəsi Avropa Parlamentinə müraciət edərək İrandakı millətlərin, özəlliklə azərbaycanlıların problemlərinin bir daha gündəmə gətirilməsini xahiş edib. Müraciətə münasibət bildirən Avropa Parlamentinin ümumi əlaqələr bölməsinin başçısı Louis A.Couqnon rəsmi açıqlama verib. Açıqlamada bildirilir:

“Avropa Birliyi və Avropa Parlamenti İrandakı millətlərin, özəlliklə azərbaycanlıların hüquqlarının pozulmasından xəbərdardır, Avropa Parlamenti İranda insan hüquqları və azadlıqlarının təmin edilməsini zəruri sayır. Avropa Parlamenti millətlərin və insan hüquqlarının qorunması və digər azadlıqların təmin olunması üçün “Recital Q” qətnaməsi çərçivəsində İrana təsir etməkdə davam edir. Biz sizi əmin edirik ki, tam müsbət nəticələr əldə olunanadək Avropa Parlamenti bu yöndəki səylərini davam etdirəcək”.

Qeyd edək ki, İran Əsirliyindəki Millətlərin Birlik Komitəsində bütün qeyri-fars millətlər təmsil olunur. Birlik Komitəsində Güney Azərbaycan Milli Oyanış Hərəkatı, Ərəb Demokratik Xalq Hərəkatı, Türkmən Milli Hərəkatı, Bəlucistan Hərəkatı, İran Tələbə Hərəkatı, Kürdüstan Demokrat Partiyası və ... təmsil olunur.

Xatırladaq ki, Güney Azərbaycan Milli Oyanış Hərəkatının lideri Mahmudəli Çöhrəqanlının Avropa ölkələrinin rəsmiləri, Avropa Parlamentindəki parlamentarlarla görüşlərindən sonra İranda qeyri-fars millətlərin, xüsusilə azərbaycanlıların milli hüquqlarının təmin olunması barədə Avropa Birliyi məşhur qətnaməsi ilə çıxış etmişdi.

Birliyin “Recital Q” qətnaməsində deyilir: “...İran çoxmillətli ölkədir. Millətlərin, xüsusilə əhalinin yarısını təşkil edən azərbaycanlıların hüquqları kobud şəkildə pozulur... İranda insan haqlarının vəziyyətinin dəqiq araşdırılması, o cümlədən millətlərin və insanların hüquqlarının pozulması, işgəncələr, gizli həbslər, qətllər və sair məsələlər barədə tərəfsiz təftişlərin aparılması İslami İnsan Haqları Komissiyasına tapşırılır. Bu barədə əldə olunan nəticələrin geniş dərc edilərək ictimaiyyətə çatdırılmasını İran dövləti təmin etməlidir.

...Avropa Birliyi İrandan millətlərin hüquq və azadlıqlarının qorunması, Beynəlxalq İnsan Hüquqları Bəyannaməsinin təmin edilməsi, düşüncə, söz və mətbuat azadlığı sahəsində irəliləyişlərə yol açmasını istəyir”.