Olaylar 2003.12.21
Azərbaycan Milli Hökumətinin qurulmasının 58-ci ildönümü ilə bağlı Təbrizdə keçirilmiş mitinq zamanı həbs edilmiş GAMOH fəallarının məhkəməsi keçirilib. Məhkəmə Təbrizin Baş İslam İnqilab Tribunalında olub. GAMOH-un Bakı təmsilçisi Hüseyn Türkelli “OLAYLAR”a bildirib ki, məhbuslar 30 milyon rial girov qoymaqla azadlığa buraxılıblar. Bunlar Qafar İbrahimi, Əmirrza Səyyadi, Savalan Radmehridir.

Azadlığa buraxılanlar arasında 7 yaşlı Rza Nəcəfi də var. H.Türkelli məktəbli uşağın həbsini biabırçılıq adlandırıb: “7 yaşlı birinci sinif şagirdinin həbsi Tehran rejiminin nə qədər qəddar olduğunu, eyni zamanda acizliyini göstərir. Rza Nəcəfi mitinqə əmisi ilə birgə gedibmiş. GAMOH fəalları həbs olunarkən onu da tutublar”.